ଉପନିର୍ବାଚନରେ ହୋଇଛି ବଡ କାରସାଦି!
ସାଙ୍ଘାତିକ ଅଭିଯୋଗ ଆଣିଲେ ବିଜେଡି ପ୍ରାର୍ଥୀନୀ
ନିର୍ବାଚନ କମିଶନଙ୍କ ଘୋଷଣାକୁ ନେଇ ଉଠାଇଲେ ପ୍ରଶ୍ନ
ବହୁ ପ୍ରତିକ୍ଷୀତ ନୂଆପଡ଼ା ଉପନିର୍ବାଚନ ଶେଷ ହୋଇସାରିଛି, କିନ୍ତୁ ଏହାକୁ ନେଇ ଏବେ ରାଜନୀତି ତେଜିବାରେ ଲାଗିଛି ।
ଉପନିର୍ବାଚନରେ ବିଜେପି ପ୍ରାର୍ଥୀ ଜୟ ଢୋଲକିଆ ବିଜୟୀ ହୋଇଥିବା ବେଳେ କଂଗ୍ରେସ ପ୍ରାର୍ଥୀ ଘାସିରାମ ମାଝି ଦ୍ଵିତୀୟ ସ୍ଥାନରେ ଥିବା ବେଳେ ବିଜେଡି ପ୍ରାର୍ଥୀନୀ ସ୍ନେହାଙ୍ଗିନୀ ଛୁରିଆ ତୃତୀୟ ସ୍ଥାନରେ ରହିଛନ୍ତି । ହେଲେ ଏହି ଫଳାଫଳକୁ ନେଇ ସଙ୍ଗୀନ ଅଭିଯୋଗ ଆଣିଛନ୍ତି ବିରୋଧୀ । ପୂର୍ବରୁ କଂଗ୍ରେସ ଟଙ୍କା ବାଣ୍ଟିବା ଏବଂ ଭୋଟ ଚୋରୀ ନେଇ ଅଭିଯୋଗ କରିଥିବା ବେଳେ ଏବେ ବିଜେଡି ମଧ୍ୟ ସଙ୍ଗୀନ ଅଭିଯୋଗ ଆଣିଛି। ବିଜେଡି ନେତ୍ରୀ ତଥା ପୂର୍ବତନ ମନ୍ତ୍ରୀ ସ୍ନେହାଙ୍ଗିନୀ ଛୁରିଆ କାରସାଦି ହୋଇଥିବା ଅଭିଯୋଗ କରି ଫଳାଫଳକୁ ଖଣ୍ଡନ କରିବା ସହ ନିର୍ବାଚନ କମିଶନଙ୍କୁ ଦୃଢ଼ ନିନ୍ଦା କରିଛନ୍ତି। ସ୍ନେହାଙ୍ଗିନୀ କହିଛନ୍ତି, “ଯେଉଁ ଭୋଟ୍ ମେସିନ୍ରେ ଆସିଛି, ମୁଁ ତାକୁ ଅଗ୍ରାହ୍ୟ କରୁଛି ଏବଂ ଫଳାଫଳକୁ ମୁଁ ଖଣ୍ଡନ କରୁଛି।” କାରଣ ନିର୍ବାଚନ ଦିନ ସନ୍ଧ୍ୟା ୫ଟାରେ ୭୫% ଓ ସନ୍ଧ୍ୟା ୭ଟାରେ ୭୭% ମତଦାନ ହୋଇଥିଲା। କିନ୍ତୁ ପରଦିନ ଦିନ ୧୦ଟାରେ ୮୧% ଓ ୧୨ଟାରେ ୮୩.୪୫% ମତଦାନ ହୋଇଥିବା କୁହାଗଲା। ଯାହାକୁ ନେଇ ସନ୍ଦେହ ପ୍ରକଟ କରିଛନ୍ତି ସ୍ନେହାଙ୍ଗିନୀ । ତାଙ୍କ କହିବା ଅନୁଯାୟୀ, ସ୍ୱାଧୀନତା ପରଠୁ ନୂଆପଡ଼ାରେ ଭୋଟିଂ ପ୍ରତିଶତ ସର୍ବଦା ୭୦% ଭିତରେ ରହିଛି। ମାତ୍ର ଏଥର ଉପନିର୍ବାଚନରେ ଅନେକ ବିରଳ ରେକର୍ଡ ସୃଷ୍ଟି ହୋଇଛି, ଯେଉଁଥିରେ ୪୧ଟି ବୁଥ୍ରେ ୯୦%ରୁ ଅଧିକ ଭୋଟ୍ ପଡ଼ିଛି। ତେଣୁ ସେ ସିଧାସଳଖ ଏହି ସମସ୍ତ ଘଟଣାକୁ କାରସାଦି ବୋଲି ଅଭିଯୋଗ କରି ନିର୍ବାଚନ କମିଶନଙ୍କ କାର୍ଯ୍ୟଧାରା ଉପରେ ପ୍ରଶ୍ନବାଚୀ ସୃଷ୍ଟି କରିଛନ୍ତି। ସେପଟେ କଂଗ୍ରେସ ମଧ୍ୟ ପୁନଃ ନିର୍ବାଚନ କରିବାକୁ ଦାବି କରିଛି ।
